‘मिमा 2026’ सोहळा. – ज्येष्ठ गायक अजित कडकडे यांना ‘संगीत रत्न जीवन गौरव पुरस्कार’
मराठी इंडी संगीत क्षेत्राला समर्पित ‘मराठी इंडी म्युझिक अवॉर्ड्स (मिमा) 2026’ हा भव्य सोहळा अलीकडेच उत्साहात आणि दिमाखात पार पडला. महाराष्ट्र आर्ट्स अँड कल्चर फाऊंडेशनतर्फे आयोजित या कार्यक्रमाला स्वातंत्र्यवीर सावरकर सभागृहाचे अध्यक्ष रणजीत सावरकर, मंजिरी मराठे, प्रियांका बर्वे, मंदार चोळकर, सावनी रविंद्र, कार्तिकी गायकवाड, अविनाश विश्वजीत यांसह संगीत क्षेत्रातील अनेक मान्यवरांची उपस्थिती लाभली.
गेल्या काही वर्षांत मराठी इंडी संगीताने स्वतःची वेगळी आणि ठळक ओळख निर्माण केली असून, चित्रपटसृष्टीच्या चौकटीबाहेर स्वतंत्रपणे संगीतनिर्मिती करणाऱ्या कलाकारांना ‘मिमा’सारख्या व्यासपीठामुळे योग्य संधी आणि प्रोत्साहन मिळत असल्याचे या सोहळ्यात स्पष्ट झाले. गायक, संगीतकार, वादक, गीतकार तसेच तांत्रिक क्षेत्रातील कलाकारांचा सन्मान करून इंडी संगीताच्या सर्वांगीण प्रवासाचा गौरव करण्यात आला.
या प्रसंगी ज्येष्ठ गायक अजित कडकडे यांना ‘संगीत रत्न जीवन गौरव पुरस्कार’ प्रदान करण्यात आला. गीतकार गुरु ठाकूर आणि गायिका बेला शेंडे यांना ‘मराठी इंडी म्युझिक आयकॉन’ पुरस्काराने गौरविण्यात आले. बासरीवादनातील उत्कृष्टतेसाठी अमर ओक यांना ‘एक्सलेन्स इन म्युझिक अवॉर्ड’, तर तांत्रिक योगदानासाठी प्रमोद चांदोरकर यांना ‘टेक्निकल एक्सलेन्स इन म्युझिक अवॉर्ड’ देण्यात आला.
‘सोबतीचा करार’ या कार्यक्रमाला ‘आयकॉनिक म्युझिक शो’चा मान मिळाला, तर अवधूत गुप्ते यांच्या ‘आई’ या अल्बमला ‘आयकॉनिक म्युझिक अल्बम’ म्हणून सन्मानित करण्यात आले. विशेष कामगिरीबद्दल आकाश देशमुख (टेंभुर्णी) यांना ‘विशेष दिव्यांग कलाकार पुरस्कार’ देण्यात आला, तसेच परदेशात मराठी संस्कृतीचा ठसा उमटवणाऱ्या व्ही. रमेश (सौदी अरब) यांना ‘प्रवासी मराठी कलाकार पुरस्कार’ प्रदान करण्यात आला.
या उपक्रमाबद्दल आयोजक अजय नाईक यांनी सांगितले की, “मिमा हा केवळ पुरस्कार सोहळा नसून मराठी इंडी संगीताच्या वाढत्या सामर्थ्याचा उत्सव आहे. स्वतःच्या बळावर उभं राहिलेलं हे संगीत आता मुख्य प्रवाहात स्थान निर्माण करत आहे. आमचा उद्देश कलाकारांना केवळ सन्मानित करणे नाही, तर त्यांना दीर्घकालीन व्यासपीठ, योग्य ओळख आणि उद्योगाशी जोडणे हा आहे.”
(सोर्स..)