अण्णामलाईंना दूर केले ? तामिळनाडूत भाजपला  नुकसान. 

पाच राज्यांतील विधानसभा निवडणुकांत भाजपने बहुतेक ठिकाणी प्रभावी कामगिरी करत आपली ताकद दाखवून दिली. पश्चिम बंगालमध्ये पक्षाने पहिल्यांदाच ऐतिहासिक यश मिळवत तृणमूल काँग्रेसची १५ वर्षांची सत्ता उलथवून टाकली. आसाममध्येही सलग तिसऱ्यांदा सत्ता राखत काँग्रेसला दूर ठेवण्यात यश मिळालं, तर पुदुच्चेरीत पुन्हा एनडीएचे सरकार स्थापन झाले. या चारही राज्यांतील विजयाचा भाजपने उत्साहात जल्लोष केला. मात्र तमिळनाडूने अपवाद ठरत पक्षासाठी निराशाजनक चित्र निर्माण केले.

तमिळनाडूमध्ये भाजपची कामगिरी अत्यंत कमकुवत ठरली. पक्षाला केवळ एकच जागा मिळाली, तर मागील निवडणुकीत चार जागांवर विजय मिळाला होता. या पार्श्वभूमीवर भाजपची घसरण स्पष्ट दिसून येते. राज्यात सध्या पक्षाकडे ठोस आणि व्यापक जनाधार असलेला चेहरा नसल्याचंही अधोरेखित झालं आहे.

माजी आयपीएस अधिकारी अण्णामलाई यांनी २०२० मध्ये भाजपमध्ये प्रवेश केल्यानंतर पक्षाला मोठ्या अपेक्षा होत्या. २०२१ ते २०२५ या कालावधीत त्यांनी प्रदेशाध्यक्ष म्हणून काम करत राज्यभर संघटन मजबूत करण्याचा प्रयत्न केला. त्यांनी एडीएमकेसोबत न जाता स्वतंत्रपणे निवडणूक लढवण्याचा आग्रह धरला होता. मात्र त्या धोरणाचा अपेक्षित फायदा झाला नाही.

२०२१ च्या विधानसभा निवडणुकीत एडीएमकेसोबत आघाडी करून भाजपला चार जागा आणि २.६ टक्के मते मिळाली होती. त्यानंतर २०२४ च्या लोकसभा निवडणुकीत आघाडी सोडल्यानंतर मतांची टक्केवारी ११ टक्क्यांपेक्षा जास्त झाली. हा पक्षासाठी महत्त्वाचा टप्पा होता. तरीदेखील, पुढील विधानसभा निवडणुकीत भाजपने पुन्हा एडीएमकेसोबत जाण्याचा निर्णय घेतला, ज्यामागे पंतप्रधान नरेंद्र मोदी आणि केंद्रीय गृहमंत्री अमित शाह यांची रणनीती होती.

अण्णामलाई यांनी या आघाडीला विरोध दर्शविल्यामुळे त्यांना निवडणुकीपूर्वीच प्रदेशाध्यक्षपदावरून हटवण्यात आले. त्यानंतर त्यांना उमेदवारीही देण्यात आली नाही आणि प्रचारातही त्यांना दुय्यम स्थान दिलं गेलं. दरम्यान, त्यांनी मांडलेले अनेक मुद्दे नंतर इतर पक्षांनीही उचलले होते, ज्यामुळे त्यांच्या नेतृत्वाची छाप राज्यात उमटली होती.

तरीसुद्धा, या निवडणुकीत भाजपने त्यांना बाजूला केल्याचा फटका पक्षाला बसला. चार जागांवरून केवळ एका जागेपर्यंत घसरण झाली. मतांची टक्केवारी थोडी वाढली असली तरी ती तीन टक्क्यांखालीच राहिली. यावरून स्पष्ट होतं की, अण्णामलाई यांना दूर ठेवण्याचा निर्णय पक्षासाठी प्रतिकूल ठरला.

एकूणच, तमिळनाडूमध्ये पुन्हा आपली ताकद निर्माण करण्यासाठी भाजपला नव्याने रणनीती आखावी लागणार आहे. एडीएमकेसोबतची आघाडी आणि अण्णामलाई यांना डावलण्याचा निर्णय पक्षासाठी महागात पडल्याचं या निकालांतून दिसून येतं