रस्त्यावर नमाज पठण करणे हा न्यायालयाचा अवमान आहे – विहिंप (VHP)
विश्व हिंदू परिषदेचे केंद्रीय संयुक्त सरचिटणीस डॉ. सुरेंद्र जैन यांनी आज म्हटले आहे की, रस्त्यांवर नमाज पठण करणे ही नमाज नसून फसाद (उपद्रव) आहे. हे केवळ संविधानविरोधीच नाही, तर मानवता आणि इस्लामविरोधी देखील आहे. याचे दुष्परिणाम लक्षात घेऊनच सात उच्च न्यायालयांनी रस्त्यांवर नमाज पठण थांबवण्याचे आदेश दिले होते. माननीय सर्वोच्च न्यायालयानेही असे संकेत दिले आहेत. याचा अर्थ असा की, रस्त्यावर नमाज पठण करण्याचा अट्टाहास हा न्यायपालिकेचा अवमानही आहे.
ते पुढे म्हणाले की, हे केवळ ५ मिनिटांचे प्रकरण नाही. जेव्हा रेल्वे रुळांवर बसून नमाज अदा केली जायची, तेव्हा दिल्लीच्या सर्व महत्त्वाच्या रेल्वे स्थानकांवर तासनतास गाड्या विस्कळीत व्हायच्या. गुरुग्राममधून जाणाऱ्या जयपूर महामार्गावर तासनतास ट्रॅफिक जाम होत असे. शालेय बस ट्रॅफिकमध्ये अडकायच्या. निष्पाप मुले रडत राहायची. रुग्णवाहिका ट्रॅफिकमध्ये अडकल्यामुळे रुग्णांच्या जीवावर बेतायचे, मात्र कोणत्याही नमाजीचे हृदय पाझरत नव्हते. डॉ. जैन म्हणाले की, अनेक हदीसमध्येही रस्त्यावर नमाज अदा करण्यास मनाई करण्यात आली आहे. त्यामुळे अनेक मुस्लिम देशांमध्येही यावर बंदी आहे. कोणत्याही सुसंस्कृत समाजात याला परवानगी दिली जाऊ शकत नाही.
त्यांनी विचारले की, भारतात ते हा अट्टाहास का करू इच्छितात? ते म्हणतात की आम्हाला मशिदींमध्ये जागा मिळत नाही म्हणून आम्ही रस्त्यावर उतरतो. जेव्हा गुरुग्राममध्ये ३८ ठिकाणी रस्ते अडवून नमाज पठण केले जायचे, तेव्हा समाजात संताप निर्माण झाला आणि हे थांबवण्यासाठी आंदोलने झाली. त्यावेळी पत्रकार बंधूंनी दाखवून दिले होते की, गुरुग्रामपासून ४० किलोमीटर अंतरावरून ट्रकमधून चटया आणि लोक आणले जात आहेत. वाटेत लागणाऱ्या अनेक मशिदी रिकाम्या असायच्या. यावरून हे स्पष्ट होते की त्यांचा हा युक्तिवाद म्हणजे केवळ फसवणूक करण्याचा प्रयत्न आहे. वास्तविक पाहता हे एक शक्तिप्रदर्शन आहे. त्यांना आपले संख्याबळ दाखवून प्रशासन आणि हिंदू समाजाला दहशतीत ठेवायचे आहे. हा दहशतवादाचाच एक प्रकार आहे.
विश्व हिंदू परिषद सर्व राज्य सरकारांना आवाहन करते की, त्यांनी रस्त्यावरील नमाज पठणावर कठोरपणे बंदी घालून सर्वांना न्यायपालिका आणि संविधानाचे पालन करण्यास प्रेरित करावे. कोणत्याही परिस्थितीत रस्त्यावर नमाज अदा करण्यास परवानगी दिली जाऊ शकत नाही. मुल्ला-मौलवींनीही मुस्लिम समाजाला कायद्याचे पालन करण्याची प्रेरणा द्यावी, त्यांना दहशतवादाच्या आणखी एका मार्गावर ढकलू नये.