सोन खरेदी करू नका, पेट्रोल डिझेल कमी वापरा.
Narendra Modi यांनी हैदराबादमधील एका सभेत देशवासीयांना पुढील एक वर्ष सोने खरेदी टाळण्याचे आवाहन केले. जागतिक स्तरावर सुरू असलेल्या युद्धपरिस्थितीमुळे निर्माण झालेल्या तेलसंकटाचा परिणाम भारतावरही होत असल्याचे त्यांनी सांगितले. विशेषतः अमेरिका, इस्त्रायल आणि इराण यांच्यातील संघर्षामुळे जागतिक पुरवठा साखळी विस्कळीत झाली असून पेट्रोल, डिझेल, गॅस आणि खतांच्या किमती मोठ्या प्रमाणात वाढल्या आहेत, असे त्यांनी नमूद केले.
पंतप्रधानांनी सांगितले की, गेल्या दोन महिन्यांपासून केंद्र सरकार नागरिकांवर या संकटाचा भार पडू नये यासाठी प्रयत्न करत आहे. मात्र, जागतिक पुरवठा साखळीवरील दबाव कायम राहिल्यास अडचणी वाढू शकतात. त्यामुळे देशहिताला प्राधान्य देत प्रत्येक नागरिकाने जबाबदारीने वागण्याची गरज असल्याचे त्यांनी स्पष्ट केले.
यावेळी त्यांनी देशवासीयांना काही महत्त्वाचे संकल्प करण्याचे आवाहन केले. पेट्रोल आणि डिझेलचा वापर शक्य तितका कमी करावा, शहरांमध्ये मेट्रो सेवा उपलब्ध असेल तर तिचा अधिक वापर करावा, तसेच कारने प्रवास करताना ‘कारपूल’चा अवलंब करावा, असे त्यांनी सांगितले. मालवाहतुकीसाठी रेल्वेचा अधिक वापर करण्याचेही त्यांनी सुचवले, कारण इलेक्ट्रिक रेल्वेमुळे इंधनाची बचत होते.
तसेच, इलेक्ट्रिक वाहनधारकांनी आपल्या वाहनांचा जास्तीत जास्त वापर करावा, असेही आवाहन त्यांनी केले. खाद्य तेलाच्या वापराबाबतही संयम बाळगण्याची गरज त्यांनी व्यक्त केली.
“देशासाठी केवळ मरणेच देशभक्ती नसते, तर देशासाठी जगणे आणि आपल्या जबाबदाऱ्या प्रामाणिकपणे पार पाडणेही तितकेच महत्त्वाचे असते,” असे सांगत या जागतिक संकटाच्या काळात प्रत्येक नागरिकाने देशहितासाठी योगदान द्यावे, असे आवाहन पंतप्रधानांनी केले.